У нядзелю 22 чэрвеня ў капліцы агр. Гарадок адбылося ўрачыстае святкаванне Нараджэння святога Яна Хрысціцеля.
Мясцовыя вернікі маліліся разам са святарамі капуцынамі бр. Уладзіславам Мінько і бр. Андрэем Зуем, хорам парафіі святога Казіміра Маладзечна і гасцямі, якія спецыяльна прыехалі паўдзельнічаць у адпустовай святой Імшы.
Большасць мясцовых парафіянаў, якія ўжо дасягнулі сталага ўзросту, добра знаёмыя паміж сабой. Яны падаюць натхняльны прыклад вернасці і шчырасці ў веры. Супольная малітва аб’яднала ўсіх прысутных, стварыўшы асаблівую атмасферу духоўнага адзінства і сапраўднага хрысціянскага братэрства.
Падчас пропаведзі бр.Уладзіслаў заклікаў вернікаў запытаць у глыбіні свайго сэрца: «Кім сапраўды з’яўляецца для нас Ісус Хрыстос?» – каб кожны мог пераасэнсаваць асабістыя адносіны з Богам і яшчэ мацней адчуць Ягоную любоў і блізкасць.
Гэтае свята стала яшчэ адной нагодай умацаваць веру, падзяліцца радасцю і адчуць сапраўдную супольнасць у Хрысце.
Тэкст: Марына Роўда
Фота: Крысціна Арлёнак
