Вось і падышоў да канца май – месяц, які асаблівым чынам прысвечаны Божай Маці. І ў апошні дзень гэтага месяца дзеці з розных парафій Беларусі, якія ў гэтым годзе прыступілі ўпершыню да сакрамэнтаў Пакаяння і Святой Камуніі, сустрэліся ў Нацыянальным санктуарыі ў Будславе, каб злучыцца з Хрыстом і праславіць Бога. Разам з пробашчам Уладзіславам Мінько і сястрой Кацярынай Грынчык першакамунійныя дзеці нашай парафіі і іх бацькі таксама прынялі ўдзел у малітоўнай сустрэчы.
Кароткачасовы дождж падчас Святой Імшы выклікаў усмешкі на тварах пілігрымаў. Прыемна было назіраць, як дзеці і дарослыя клапаціліся адзін пра аднаго, запрашаючы пад свае парасоны. Сонейка, якое хутка абагрэла, абсушыла, дало надзею вернікам на працяг святочнага мерапрыемства.
Мітрапаліт Мінска-Магілёўскай архідыяцэзіі арцыбіскуп Юзаф Станеўскі, разважаючы над словамі Евангелля аб тым, як Марыя сустрэлася са сваячкай Альжбетай, запрасіў дзетак успомніць, з якой радасцю раней сустракалі іх бабулі і дзядулі, да якіх яны гэтым летам прыедуць падчас канікул. Ён заклікаў маленькіх вернікаў убачыць гэтую радасць і дзяліцца ўсмешкай з тымі, хто побач. “Бо вы – радасць і надзея нашага Касцёла!”, – падкрэсліў напрыканцы гаміліі іерарх.
Ад усяго сэрца дзякуем сужонкам Івану і Марыне Невяровічам, якія ахвяравалі свой час, каб завесці ў Будслаў нашых дзяцей і вернікаў з касцёла святога Юзафа ў Маладзечне.
Маці Божая “свеціць пілігрымуючаму Божаму народу, як знак пэўнай надзеі і суцяшэння”*. Праз яе заступніцтва жадаем усім дзецям свядома мець надзею і радасць уваскрослага Хрыста.
_______
*-ІІ Ватыканскі Сабор, LG, 68.
Тэкст: Алена Каралькова
Фота: Алена Каралькова, Марыя Арцішэўская
