У нядзелю 16 лютага супольнасць міністрантаў у нашай парафіі павялічылася яшчэ на двух чалавек. Кандыдаты Валянцін Губко і Цімафей Станкевіч выдатна вытрымалі экзамен і падчас Святой Імшы а 10 гадзіне былі ўрачыста прыняты на наступную ступень служэння пры алтары - міністранты-харалісты.
Быць міністрантам - гэта не толькі дапамагаць святару на Імшы, але і рашэнне дадаткова паглыбляць свае веды і сваё духоўнае жыццё. На першай ступені дастаткова толькі жадання. На астатніх неабходна развіваць ахвярнасць і вернасць гэтай паслузе.
Старэйшыя міністранты апякуюцца малодшымі, вучаць іх, дапамагаюць сваімі парадамі і падказкамі. Браты арганізуюць шмат цікавых мерапрыемстваў, каб супольнасць міністрантаў развівалася і ўмацоўвалася. Існуюць нават спаборніцтвы паміж міністрантам розных парафій.
Супольнасць служыцеляў алтара заўсёды адкрыта для новых юнакоў, якія хочуць стаць міністрантамі.
Тэкст і фота: Людміла Губко