Лета – прыемны час, час адпачынку! Нашы юныя парафіяне на канікулах не толькі адпачываюць, але і сваімі талентамі і здольнасцямі праслаўляюць нашу парафію!
11 ліпеня з нагоды 25-гадовага юбілею Віцебскай дыяцэзіі ў Мёрах каманда нашых хлопцаў на чале з братам Уладзіславам Мінько прыняла ўдзел у адкрытым турніры па міні-футболе сярод міністрантаў. Ініцыятарам спаборніцтва з’яўляецца вікарый Мёрскай парафіі ксёндз Алег Зямчонак.
Усяго ў спаборніцтвах прынялі ўдзел чатыры каманды з трох дыяцэзій: Віцебскай, Гродзенскай і Мінска-Магілёўскай архідыяцэзіі.
Гэта каманды міністрантаў з Глыбокага, Гервятаў (Гродзенская дыяцэзія) і Маладзечна (Мінска-Магілёўская архідыяцэзія), а таксама каманда гаспадароў з Мёраў (Віцебская дыяцэзія).
Наша каманда была прадстаўлена ў наступным складзе:
1. Мацвей Вяжэвіч
2. Якаў Дасюкевіч
3. Дамінік Гаранін
4. Арцём Гурштыновіч
5. Канстанцін Губко
6. Цімафей Станкевіч
7. Антон Савянок
8. Марк Каралькоў.
Праграма турніру распачалася ў касцёле Унебаўзяцця Найсвяцейшай Панны Марыі, дзе ўдзельнікаў спаборніцтва прывітаў біскуп Віцебскі Алег Буткевіч.
Права распачаць турнір і забіць першы гол атрымаў біскуп Алег.
Пасля таго, як суддзі Алег Грыгаровіч, Андрэй Чарняўскі і Анатолій Заяц нагадалі ўдзельнікам правілы спаборніцтваў, распачаліся матчы паміж камандамі.
Першымі гулялі нашы міністранты з камандай з Гервят. Гульцы задалі бадзёры тон спаборніцтву і паказалі даволі высокі ўзровень гульні. Па выніках двух таймаў перамаглі нашы міністранты.
Наступнымі на поле выйшлі каманды з Глыбокага і Мёраў. Барацьба была сур'ёзнай. Перавага была на баку міярчан.
Усе з хваляваннем чакалі фіналу. Каманды з Мёраў і Маладзечна не падвялі гледачоў і прадэманстравалі свае лепшыя здольнасці. Абедзве каманды гулялі дакладна і зладжана, аднак па выніках двух таймаў перамаглі гаспадары турніру.
Гульня завяршылася і яе вынікі наступныя: бронзавыя медалі заваявала каманда міністрантаў з парафіі Найсвяцейшай Тройцы ў Гервятах, залатыя медалі і кубак турніру атрымалі гаспадары спаборніцтва – каманда міністрантаў з парафіі Унебаўзяцця Найсвяцейшай Панны Марыі ў Мёрах. Наша каманда міністрантаў парафіі святога Казіміра атрымала сярэбраныя медалі! Ганарымся!
Падчас турніру міністранты спаборнічалі не толькі на футбольным полі, але і прадэманстравалі свае здольнасці ў веданні Літургіі і Святога Пісання. Лепшымі ў конкурсе Літургічных ведаў сталі міністранты з Глыбокага, другое месца – Мёры, трэцяе – Маладзечна.
Дзякуем брату Уладзіславу Мінько, міністрантам, Вадзіму Каралькову, які суправаджаў і падтрымліваў гульцоў, за праслаўленне нашай парафіі! Няхай усё, што робіцца, будзе на хвалу Богу!
Жадаем нашым міністрантам новых перамог, а таксама, вядома ж, прыемнага і карыснага адпачынку!
Тэкст: Таццяна Шумель
Фота: Вадзім Каралькоў, Жанна Закрэўская
