3 чэрвеня ў Нацыянальным санктуарыі ў Будславе адбылася малітоўная сустрэча дзяцей з усёй Беларусі, якія ў гэтым годзе ўпершыню прынялі Святую Камунію. Нашыя дзеці з Маладзечна таксама прынялі актыўны ўдзел.
Сустрэча пачалася з прывітальнага слова Мітрапаліта Мінска-Магілёўскага арцыбіскупа Юзафа Станеўскага.
Затым салезіянскай моладдзю была прадстаўлена тэатральная пастаноўка пра гісторыю цудоўнага з’яўлення абраза Маці Божай Будслаўскай.
Кульмінацыяй малітоўнай сустрэчы стала святая Імша, якую ўзначаліў арцыбіскуп Юзаф Станеўскі.
У якасці падарунка першакамунійныя дзеці атрымалі Цудадзейныя медалікі Беззаганнай Панны Марыі, якія паблагаславіў сам арцыбіскуп, а таксама кнігу “Кубак з адным вухам” аўтара кс. Яна Твардоўскага.
Пасля св. Імшы ўсіх дзяцей пачаставалі вельмі смачным гарачым абедам. Затым дзяцей чакала неверагодная святочная праграма з танцамі, гульнямі і конкурсамі.
Малітоўная сустрэча сапраўды была вельмі плённай, напоўненай Божай ласкай і атуленай апекай Маці Божай Будслаўскай!
Тэкст, фота: Алёна Арлоўская
