Skip to main content

Свята мудрасці, удзячнасці і цяпла: у капліцы адзначылі Дзень дабра і павагі

| Падзеі »
 4 10 2026dabra18

У нядзелю, 4 кастрычніка, валанцёры парафіяльнага «Карытас» падарылі сапраўднае свята вернікам сталага веку нашай парафіі. Урачыстая сустрэча, прымеркаваная да Міжнароднага дня пажылых людзей, прайшла пад назвай «Дзень дабра і павагі».

 4 10 2026dabra23

На гэты час прастора капліцы ператварылася ва ўтульную, гасцінную кавярню: за святочна сервіраванымі столікамі з пачастункамі і духмянай гарбатай размясціліся нашы дарагія парафіяне. Атмасфера хатняга супакою і клопату з першых хвілін наладзіла ўсіх на шчырую размову.

 4 10 2026dabra36

Святкаванне распачалося з малітвы і слоў падзякі. Гвардыян манаскай супольнасці брат Андрэй Жылевіч звярнуўся да прысутных з цёплым пастырскім словам. Ён сардэчна павіншаваў старэйшае пакаленне з днём мудрасці, падзякаваў за іх неацэнны малітоўны ўклад, адданасць Касцёлу і жывы прыклад глыбокай веры для моладзі, а таксама пажадаў кожнаму заставацца бадзёрымі, душэўна маладымі і радаснымі.

 4 10 2026dabra27

Музычную праграму вечара падрыхтавалі таленавітыя выканаўцы — Мікалай і Уладзімір. Пад жывыя акорды гітары, залівісты баян і аксамітныя мелодыі саксафона гучалі песні розных гадоў, якія адгукаліся ў сэрцы кожнага. Першай супольнай песняй стала знакамітая «Как здорово, что все мы здесь сегодня собрались». Гэтыя радкі сталі лейтматывам сустрэчы, бо адчуваць сябе часткай адной вялікай парафіяльнай сям’і — гэта сапраўдны Божы дар.

 4 10 2026dabra30

Асаблівую ажыўленасць і ўсмешкі выклікаў інтэрактыўны конкурс «Рэтра-аўкцыён». Госці з задавальненнем акунуліся ў светлыя ўспаміны маладосці: узгадвалі знакамітыя тавары мінулых дзесяцігоддзяў, тыя самыя капейкі і дзяліліся кранальнымі жыццёвымі гісторыямі. Дружныя спевы і нават імправізаваныя танцы стварылі непаўторны святочны настрой.

 4 10 2026dabra38

Прыгожай фінальнай кропкай стала ўручэнне кветак: кожны з прысутных атрымаў жывую ружу. Гэты сімвал набыў асаблівую глыбіню менавіта зараз, у кастрычніку — месяцы Ружанцовай малітвы, як знак таго, што Маці Божая Ружанцовая нястомна атуляе кожнага сваім мацярынскім покрывам і заступніцтвам.

 4 10 2026dabra50

Выказваем найшчырэйшую падзяку людзям сталага веку нашай парафіі за веру, працу і нястомную малітву. Моцнага вам здароўя, нязгаснай надзеі і да новых радасных сустрэч!

 4 10 2026dabra22

 

 Тэкст: Ірына Фаміна

Фота, відэа: Ігар Лапата, мантаж відэа Ксенія Трот