Адвэнт — гэта час ціхага і радаснага чакання, час, калі мы рыхтуем нашыя сэрцы да прыйсця Збаўцы. І найлепшая падрыхтоўка — гэта канкрэтныя ўчынкі любові. Менавіта такую магчымасць прапанавалі вернікам валанцёры парафіяльнага «Карытас», зладзіўшы на пачатку Адвэнту дабрачынную акцыю пад вельмі красамоўнай назвай «Адкрый сваё сэрца».
Мэтай акцыі была падтрымка тых, хто штодня сутыкаецца з асаблівымі выклікамі — сем’яў, якія выхоўваюць дваіх дзяцей з інваліднасцю, а таксама сем’яў, дзе бацькі з інваліднасцю самі выхоўваюць дзяцей з асаблівасцямі развіцця.
Ідэя была простая і вельмі асабістая: сабраць 109 індывідуальных падарункаў для кожнага дзіцяці з гэтых сем'яў, а таксама падрыхтаваць асобныя падарункі для 13 сем'яў, у якіх бацькі маюць інваліднасць.
Вынік акцыі пераўзышоў усе чаканні. Дзякуючы неверагоднай шчодрасці і адкрытасці сэрцаў парафіян, усе 109 падарункаў былі сабраны. Нядаўна валанцёры «Карытас» закончылі перадачу падарункаў адрасатам.
Эмоцыі, якія атрымалі ўсе ўдзельнікі, немагчыма перадаць словамі. Сем'і былі вельмі крануты такой падтрымкай. Яны шчыра дзякавалі не толькі за цудоўныя падарункі, але і за самае галоўнае — за памяць. «Дзякуй, што Касцёл памятае пра нас і падтрымлівае», — такія словы гучалі часцей за ўсё.
Выказваем велізарную, шчырую падзяку кожнаму парафіяніну за шчодрасць сэрца, за малітоўную і матэрыяльную падтрымку людзей з асаблівасцямі развіцця. Асобная падзяка нашым нястомным валанцёрам, якія сталі арганізатарамі і рухавіком гэтай цудоўнай ініцыятывы.
Акцыя «Адкрый сваё сэрца» стала яскравым сведчаннем таго, як еднасць парафіяльнай супольнасці, памножаная на любоў і спагаду, ператвараецца ў сапраўдны адвэнтавы цуд, які дорыць надзею і святло.
Тэкст: Фаміна Ірына
Фота: Ірына Фаміна, бр. Андрэй Жылевіч, Таццяна Сакалоўская
